დღე XIV

თემა: ა. ჯანაშვილის „ნიანგმაც იცის მეგობრობა“

მოგესალმებით „მკითხველთა კლუბის“ ერთგულო მეგზურებო და მკითხველებო. განსკუთრებით მოგესალმებით თქვენ, ჩვენო სტუმრებო, „ახალო“ მეგობრებო. კეთილი იყოს თქვენი მობრძანება მკითხველთა კლუბის სამყაროში. თქვენ სწორი არჩევანი გააკეთეთ, რადგან ყოველ ორშაბათსა და პარასკევს „მკითხველთა კლუბი 81-ე სკოლიდან“ გაწვდით ახალ-ახალ, საოცარ ინფორმაციებს, მათი ჯადოსნური მოგზაურობების შესახებ. იმედია, თქვენც ჩვენი ერთგული მეგზურები გახდებით და ყველანი ერთად გავაგრძელებთ თავგადასავლებით აღსავსე მოგზაურობას კითხვის ჯადოსნურ სამყაროში.

დღეს ბევრი საინტერესო რამ უნდა გიამბოთ. ფასილიტატორებმა პატარა მკითხველებისა და სიტყვების მეგობრობის გასამყარებლად ახალი აქტივობა-„ფერადი სიტყვების სააგენტო“ მოვიგონეთ. თითოეული გუნდისთვის შეიქმნა „ფერადი სიტყვების სააგენტო“, რომელიც როგორც სურათზე ხედავთ, ჯერ სულ მარტოა, თავისუფალია და მოთმინებით ელოდება ბევრ სხვადასხვა ფერად- ფერად სიტყვას.

სწორედ ჩვენს პატარა მკითხველებზეა დამოკიდებული, რა მასშტაბებით იქნება წარმოდგენილი „ფერადი სიტყვების სააგენტო“, რადგან ყოველი შეხვედრის დასასრულს ბავშვებმა უნდა მიაკრან ის სიტყვები, რომლებიც ისწავლეს, გაიგეს კონკრეტული შეხვედრიდან. მომდევნო შეხვედრაზე „ფერადი სიტყვების სააგენტოდან“ გამოითხოვენ იმ სიტყვას, რომელიც უკვე შესწავლილად მიიჩნიეს და სხვადასხვანაირი გზებით აუხსნიან მეგობრებს, რა სიტყვაზეა საუბარი. იმ შემთხვევაში, თუ „გაშიფრულად“ მიჩნეულ სიტყვას ვერ აუხსნიან კლუბის სხვა წევრებს, სამწუხაროდ, სიტყვა დატოვებს „სააგენტოს“ და მხოლოდ იმ შემთხვევაში დაუბრუნდება კუთვნილ ადგილს, როდესაც თავისი „მეპატრონე“ ძალიან კარგად შეისწავლის.

დღეს ჩვენი შეხვედრა სწორედ ამ სახალისო და საინტერესო აქტივობით დავიწყეთ. აქტიურმა მკითხველებმა გაიხსენეს „გაშიფრული“ სიტყვები, დარწმუნდნენ თავიანთ ცოდნაში და მხოლოდ ამის შემდეგ განათავსეს ისინი „ფერადი სიტყვების სააგენტოში.“

ნახეთ, არ ხუმრობენ მკითხველთა კლუბის წევრები, ასე თუ გააგრძელეს, წარმომადგენლობითი „სიტყვების სააგენტოები“ გვექნება.

შეხვედრის მეორე ეტაპზე განვიხილეთ ახალი საინფორმაციო ტექსტი-„ნიანგმაც იცის მეგობრობა.“ თითოეულმა გუნდმა თავიანთ ფასილიტატორთან ერთად გაანალიზა ტექსტი, განმარტა უცნობი სიტყვები.

ტექსტის გაანალიზების შემდეგ ანიმაციის ხილვის დრო დადგა. დღეს მკითხველთა კლუბს - „ჩიტუნა ტარი“ ეწვია. აქტიურმა მკითხველებმა და მსმენელებმა შეძლეს მსგავსება-განსხავევბების აღმოჩენა წაკითხულ მოთხრობასა და ნანახ ანიმაციას შორის. 

შეხვედრის მესამე ეტაპზე კი მკითხველთა კლუბის პატარა წევრებს საპასუხისმგებლო საქმე დაეკისრათ. დღეს შესწავლილი და ასევე დამატებით მიწოდებული ტექსტების, ილუსტრაციების გამოყენებით უნდა დაემზადებინათ საინფორმაციო „პოსტერები.“

თითოეულ გუნდს განსხვავებული ტექსტი შეხვდა. გუნდმა „მეგობრულებმა“ ნიანგების და მათი სხვადასხვა სახეობის შესახებ მიიღეს დამატებითი ინფორმაციები, „აინშტაინებმა“ ალიგატორებსა და გავიალებზე წაიკითხეს საინტერესო ინფორმაციები, „ჩემპიონებმა“ გიგანტური ნიანგის შესახებ დაუჯერებელი ამბები გაიგეს. „საქმოსანმა მთვარე და ვარსკვლავებმა“ პირის ღრუს ჰიგიენასა და კბილების შესახებ ამოიკითხეს საინტერესო ინფორმაციები. ალბათ, უცნობი მკითხველისთვის ერთი შეხედვით გაუგებარი იქნება რა კავშირშია კბილების ჰიგიენა და ნიანგები, მაგრამ თუ ისეთივე დაკვირვებით წაიკითხავთ, გაეცნობით დღევანდელ ამბებს, ისევე გაგიადვილდებათ ამ კავშირების დანახვა, როგორც „საქმოსანმა მთვარემ და ვარსკვლავებმა“ მოახერხეს. მეტიც, მათ რჩევებიც კი მისცეს მეგობრებს რატომ არის მნიშვნელოვანი კალციუმი კბილებისა და ძვლების სიძლიერისთვის და ამაში დასარწმუნებლად ცდაც კი შემოგვთავაზეს.

ცდის შედეგებს 48 სთ სჭირდება, ამიტომ პატარა მკითხველები მოუთმენლად ელოდებიან შედეგებს. თქვენც აუცილებლად მოგიყვებით ცდის შედეგებზე ორშაბათს.

ვფიქრობთ, თითოეულმა გუნდმა გაართვა თავი დაკისრებულ პასუხისმგებლობას და შექმნა საინფორმაციო პოსტერები. მგონი, მშვენივრად გამოიყურება, არა?

შეხვედრის დასასრულს მეგობრებმა ერთმანეთს გააცნეს საკუთარი მოსაზრებები.

დამშვიდობებამდე არც „ფერადი სიტყვების სააგენტო“ დავიწყებიათ, შეხვედრაზე ახლადგაცნობილ სიტყვებსაც მიუჩინეს თავიანთი ადგილები. შრომატევადი და ხარისხიანი მუშაობისთვის გუნდებს ჯილდოდ გადაეცათ ფერადი ვარსკვლავები.

დღევანდელმა შეხვედრამაც ხალისიანად და საინტერსოდ ჩაიარა.

იმედია, თქვენც მოგეწონათ ჩვენთან ერთად ყოფნა. გემშვიდობებით საუკეთესო სურვილებით ორშაბათამდე.

 გეგმის გადმოსაწერად გადადით ბმულზე : http://www.slideshare.net/mtbiblia/12-59905900